Basta
xa de pisotear ao estudantado, non tiñan suficiente con implantar a LOMCE, con
subir as taxas, con dificultar o acceso aos fillos dos traballadores obstaculizando
a obtención de bolsas e con reválidas.
Non, non lles bastaba, na súa estratexia de facer da universidade un
negocio propio e ao servizo de bancos e grandes
empresas, a USC, no claustro celebrado
o 18 de novembro de 2014, aproba a venda das facultades de Enfermería e
Maxisterio (reubicando aos estudantes noutras facultades xa masificadas), así
como a redución de 300 postos de traballo para os próximos 3 anos, mediante
non-renovacións e xubilacións forzosas.
A isto se lle vén
sumando a aprobación do novo plan universitario 3+2, que implica unha redución
do grao a 3 anos e un aumento do máster a 2. Desta forma, o grao vai ser máis
xeralista e se fará máis preciso o estudo dun máster, cuxas matrículas son
extremadamente caras. Isto precarizará aínda máis o noso ensino e poranos moi
difícil aos fillos dos traballadores poder estudar unha carreira universitaria.
Ante
isto as distintas Asembleas Abertas xunto con outras organizacións estudantís
deciden convocar Folga o día 26, unificando todas as revindicacións propias de
cada facultade, mais non quedándose en loitar por fungallas, senón reclamando o
ensino que nos corresponde: un ensino popular, non patriarcal e en galego!
Para
este fin organizáronse e estanse a organizar Comités de Folga en cada centro de
ensino, coordinándose todos eles por medio de representante escollidos democraticamente
e revogables en calquera momento, método de organización que está a demostrarse o máis útil e
democrático. Dende o Colectivo Outubro animámosvos a todos os estudantes a
participar no comité de folga dos vosos centros de estudo, á marxe dos
chanchulleos do Sindicato de Estudantes e outras organizacións estudantís.
Pero
temos que ter claro que a vitoria só é posible xuntando forzas co resto de loitas populares,
unificando cada reivindicación concreta, xa sexa contra o paro, a precariedade, ou a represión nun só torrente de loita na
rúa. Neste largo camiño debemos organizarnos ao marxe e desfacernos de aquelas
organizacións sindicais que lastran o avance do movemento estudantil,
preguntándonos a cada paso que damos cara onde nos diriximos, evitando caer no
culto a folga e fuxindo das convocatorias de certas organizacións (como o SE)
que teñen como único fin desmoralizar e desmobilizar o movemento estudantil.
De cara ao día 26 chamamos a todos os estudantes a secundar a manifestación as 11.30 na Alameda e a realizar piquetes, defendendo cos medios que sexa preciso o dereito a folga e o éxito da mesma; e revindicando con máis forza que nunca a absolución dos tres compañeiros represaliados por protestar contra Feijoo, así como o cese absoluto da represión contra o movemento estudantil.
Finalmente queremos facer un chamamento a non desaproveitar a coordinación que entre os diversos centros de estudo está xurdindo, por medio da cal estamos compartindo experiencias e aumentando exponencialmente a nosa capacidade de loita. Da Coordinadora de Comités de Folga debe quedar unha experiencia organizativa que permita darlle continuidade á loita ata acadar todos os nosos obxectivos, cuxa estrutura debe basearse na organización asemblearia e na elección de representantes revogables en calquera momento.